A Junta da Galiza desconhece a dia de hoje qual será o custe exacto da visita do Papa Bento XVI à Galiza o vindouro 6 de novembro. Assim o afirmava recentemente no parlamento autonómico o director geral de Relaçons Institucionais e Parlamentares, Roberto Castro, quem também declarava que ainda nom estaám fechados todos os preparativos e que as cifras definitivas nom se conhecerám até depois da visita.

Cumpre lembrar que inicialmente a quantidade prevista chegava aos 4 milhons de euros, cifra que posteriormente o conselheiro de Presidência, Alfonso Rueda, e o próprio Núñez Feijó rebaixavam a 3 milhons de euros.

A Junta da “austeridade” e dos recurtes nos serviços públicos nom terá reparos em destinar milhons de euros do erário público, procedentes dos orçamentos destinados à CRTVG, Turgalicia, Jacobeu e à própria Conselharia de Presidência para sufragar os gastos da visita do máximo mandatário da Igreja Católica que é, para Alfonso Rueda, umha “oportunidade histórica” para a promoçom turística do nosso país.

O Partido Popular procura assim umha nova volta de porca no processo de turistificaçom da Galiza ligado ao trato de favor e promoçom de umha instituiçom tam profundamente reaccionária como a Igreja Católica, ariete do machismo e da homofobia e apoio histórico do fascismo genocida espanhol. Nom por acaso o governo da Junta solicitava à Igreja Católica, também recentemente, a continuidade do “Ano Santo” em 2011, umha situaçom que tem como precedente mais próximo no tempo a ampliaçom do Jacobeu de 1937 a 1938, em plena “Cruzada” nacional-católica contra os povos e a classe trabalhadora do todo o Estado espanhol.