NÓS-Unidade Popular informa no seu sítio web que amanhá quinta-feira, 20 de Maio, decorrerá nos julgados de Ferrol um novo julgamento contra a esquerda independentista. Desta vez serám três companheiras as que terám que sentar-se no banco sob a acusaçom dum delito de ultrajem a Espanha.  A fiscalia solicita no seu escrito de acusaçom umha multa de 3.000 euros para cada umha delas.

Os factos remontam-se ao Dia da Galiza Combatente de 2008, quando NÓS-UP homenageava no farol de Meirás, comarca de Trasancos, às luitadoras galegas. Ao finalizar o acto umha bandeira espanhola consumia-se no lume.

Segundo informa NÓS-UP nas diligências entregadas pola Guarda Civil à Fiscalia, relatadas num novo dossier contra o MLNG, o corpo repressivo afirma identificar às pessoas que queimarom a bandeira espanhola. Isto seria graças à colaboraçom cidadá, sempre segundo a versiom da Benemérita, ao ser entregadas ao corpo repressivo umha série de fotos por anónimos bufos.

NÓS-Unidade Popular tem convocada umha concentraçom em solidariedade com as três companheiras para as 9.45h diante dos julgados de Ferrol.

Novo fracaso da Guarda Civil

Por umha outra parte NÓS-UP também fixo público hoje que finalmente a fiscalia da Audiência Provincial de Ponte Vedra acabou por desestimar a denúncia que a Guarda Civil tinha apresentado contra quatro membros da sua Direcçom Nacional pola difusom de um vídeo na rede na que se deixava em evidência a imparcialidade judicial durante um julgamento contra dous militantes independentistas acusados de danificar simbologia fascista no sul da Galiza.

Podes ver mais informaçom no web da organizaçom independentista.