Actualizaçom às 11.30. Passadas as 10.30h da manhá a Guarda Civil cumpria o seu ultimátum despejando pola força a vizinhança de Canedo. Várias dotaçons da Unidade de Intervençom do corpo repressivo espanhol despejavam violentamente a vizinhança de Canedo que permanecia acampada na zona das obras.

Após a carga, há  sete  pessoas detidas, entre elas o presidente da Associaçom Vicinal, Luis Pardo, e o Responsável Comarcal de NÓS-Unidade Popular no Condado, Abraám Alonso. Estes últimos fôrom deslocados à esquadra de Salvaterra de Minho.

NÓS-Unidade Popular acabou de informar no seu web do ultimátum recebido há escassos minutos polas vizinhas e vizinhos de Canedo que ocupam as obras ilegais para a construçom dumha rotunda na sua paróquia.

A seguir reproduzimos a nota que informa sobre as ameaças policiais assim como o comunicado de datado ontem onde se explicam os motivos da ocupaçom.

URGENTE: Guardia Civil lança ultimátum à vizinhança de Canedo
A vizinhança de Canedo acha-se nesta altura ocupando as obras ilegais para a instalaçom dumha rotunda nesta paróquia ponteareana. Após passar toda a tarde e a noite de ontem no lugar o objectivo é evitar que hoje podam começar os trabalhos de construçom.

Porêm, companheiros e companheiras participantes na acçom informam de que pouco depois das 10:00 agentes da Guarda Civil com material antidistúrbios ameaçárom às vizinhas e vizinhos concentrados com dispersá-los violentamente se nom abandonam o lugar.
Actualizaremos esta informaçom em quanto recebamos qualquer novidade.

Continua a luita das vizinhas e vizinhos de Canedo

Por volta das 15h do dia 15 de Junho, vizinhas e vizinhos de Canedo davam um passo mais ao fronte na sua luita contra o Ministério espanhol de Fomento que leva a cabo umhas obras em Ponte Areias que carecem das licenças necessárias.

Umha delas seria a que deve outorgar a Confederaçom Hidrográfica ao estar a obrar sobre o cauce dum regato, ao qual ao tempo se continuam a verter águas fecais misturadas com pluviais desde as novas estruturas.

A luita paciente e constante da vizinhança de Canedo, liderada em boa parte polo presidente da Associaçom de Vizinhas e Vizinhos de Sam Vicente e Canedo, é digna de ter em conta e da qual cumpre tomar boa nota. Quase toda a vizinhança implicada tem um conhecimento profundo da situaçom e dos movimentos que os políticos ao serviço do capital vam dando. Assim o PSOE local nom dá quase sinais de vida e dedica-se a defender a actuaçom de Fomento. O PP local aguarda que o problema desgaste ao PSOE e nom se implica o mais mínimo. O BNG, pola sua banda, trata de estar presente mais para a foto do que outra cousa, tendo sido ele mesmo o que salvou no seu momento a ministra de Fomento anterior, Magdalena Álvarez.

A questom da diginidade da vizinhança destes bairros ponteareáns nom fica aqui. À vista de que as águas fecais e pluvias baixam já mesturadas desde os seus bairros, e que continuam cara o rio Tea, na quinta-feira 11 de Junho tinha lugar umha reuniom entre colectivos, forças políticas entre elas a nossa, pescadores/as… para a constituiçom dumha plataforma de defesa do rio Tea, plataforma da qual evidentemente faremos parte.

Hoje, após termos conseguido paralisar a obra e montar acampamento no interior da mesma, ficaremos aí ao carom da vizinhança para passar a noite para que amanhá as obras nom podam continuar. Continuaremos a informar da situaçom e aguardamos poder subir ao web umha entrevista ao presidente da associaçom vicinal.