Abrente

Ediçons digitais da publicaçom trimestral do nosso partido

Documentaçom

Textos e outros documentos políticos e informativos de interesse

Ligaçons

Sites recomendados de ámbito nacional e internacional

Opiniom

Artigos assinados sobre temas de actualidade galega e internacional

Video

Documentos audiovisuais disponíveis no nosso portal

Home » Em destaque, Nacional, Notícias

Nova etapa de Primeira Linha em rede, com mais força e mais razons… para a Revoluçom Galega

Terça-feira, 24 Março 20094 Comentários

Quando o nosso partido tomou a decisom, no quadro do seu III Congresso, de incorporar a Internet como mais um ámbito de trabalho político e de comunicaçom, ultrapassando o que até entom era o principal meio, o Abrente em papel, eram poucos ainda os sítios informativos ditos alternativos no ámbito digital. Também eram poucos os partidos e organizaçons políticas galegas presentes na rede.

Desde aquele 30 de Março de 2002 em que este primeiralinha.org foi activado, o panorama informativo e político galego na Internet tem mudado de maneira muito importante. Ao contrário dos meios em papel, em que o espanhol tem inclusive maior poder frente ao galego do que em 2002, na rede foi possível o surgimento de portais informativos de carácter militante em diferentes ámbitos do trabalho dos movimentos sociais com o nosso idioma como protagonista. Também fôrom lançados vários projectos informativos de carácter empresarial em galego e com umha orientaçom mais galega do que é habitual noutros espaços comunicativos, embora as grandes empresas do capitalismo espanhol mantenham a hegemonia.

Na continua sucessom de mudanças operada na rede nestes oito anos, este modesto espaço correspondente ao independentismo de orientaçom comunista tem merecido umha apreciável resposta e seguimento reflectidos no número de visitas, superior à média do total de iniciativas semelhantes existentes na Galiza.

Sem podermos concorrer com projectos sustentados no lucro empresarial, o trabalho destes anos reafirmou-nos no acerto de apostarmos na Internet como espaço comunicativo ao serviço das classes populares galegas e da sua emancipaçom, ajudando-nos a socializar o programa político independentista e comunista.

As possibilidades da rede para dar a conhecer a outros povos a realidade da luita nacional e social de género existente na Galiza é outra virtude deste meio, que também nos permitiu conhecer outras luitas, outras organizaçons irmás e um bom número de compatriotas espalhados um pouco por todo o mundo que mantenhem, graças a este espaço, mais um ponto de contacto com a realidade da classe trabalhadora galega.

Contodo, a evoluçom tecnológica da Internet vinha obrigando-nos a evoluir e dotar o site de Primeira Linha de maiores possibilidades comunicativas e técnicas, para assim podermos avançar nos objectivos inerentes ao projecto.

Esta nova versom, ainda em fase Beta,  do portal informativo e político do nosso partido que hoje lançamos é o resultado desse modesto passo em frente, com um novo formato mais ágil e atraente, que facilita a navegaçom e ordena os conteúdos de maneira mais efectiva.

Tentamos manter, no fundamental, a estrutura da página anterior, inclusive simplificando-a. Além de incorporarmos um espaço próprio para as colaboraçons de camaradas, companheir@s e amig@s do nosso partido na secçom de Opiniom, o aspecto gráfico e o acesso som as principais novidades.

Também incorporamos umha funçom pouco habitual na maior parte de páginas de organizaçons políticas da esquerda nacional galega: a possibilidade de que as nossas e os nossos visitantes opinem e comentem cada conteúdo publicado, através da nova secçom de comentários.

Além de todo o dito, a maior facilidade do trabalho nesta nova página servirá para aumentar e melhorar o nosso trabalho de redacçom e publicaçom de conteúdos sobre as luitas sociais na Galiza, com a mesma perspectiva anticapitalista e independentista de sempre.

Nesta segunda etapa que hoje começamos, esperamos continuar a contar com a tua fiel participaçom e só che pedimos um pequeno gesto de apoio ao nosso projecto, que também é teu: traz outr@ amig@ também!

-->