Reproduzimos integramente o comunicado emitido por NÓS-Unidade Popular perante o próximo Dia da Pátria.

Analisada a situaçom de extrema fragmentaçom organizativa e dispersom ideológica da esquerda nacional galega, a Direçom Nacional de NÓS-Unidade Popular aprovou a consolidaçom da convocatória independentista lançada no passado ano com motivo do 25 de Julho, Dia da Pátria.

A convocatória do ano anterior foi marcada já pola constataçom da falta de sustento da suposta proposta unitária realizada por umha parte do soberanismo. Assim, se bem na altura pudo parecer a alguns que a iniciativa de NÓS-UP tinha caráter excludente em relaçom à convocatória de Causa Galiza, o passar dos meses confirmou a nossa análise: nom existiam, nem existem, condiçons para apresentar umha convocatória unitária séria e estável da esquerda revolucionária e independentista galega.

Infelizmente, a realidade impom-se aos discursos e às supostas intençons e nos últimos meses temos assistido a sucessivas rupturas, cisons e recomposiçons no campo da esquerda galega, incluído o soberanismo. Além de representar um lamentável espetáculo de escassa madurez e excessivos protagonismos particulares, este panorama mostra-nos umhas tendências negativas para a necessária construçom nacional galega e para a afirmaçom dos direitos e interesses da maioria social.

NÓS-Unidade Popular decidiu, como é público e notório, ficar à margem dessas disputas de curto percurso e, em lugar disso, trabalhar com o olhar posto na construçom, sem pressa e sem pausa, de um projeto político sólido do ponto de vista ideológico e organizativo, que responda aos interessses do povo trabalhador galego como sujeito político e que ajude a combater a dependência nacional, o capitalismo e o patriarcado, firmemente assentes no nosso país, Galiza.

É a partir das condiçons concretas que acabamos de resumir que deve entender-se a nossa decisom de apresentar aos setores mais dinámicos e luitadores do nosso povo umha convocatória abertamente independentista, anticapitalista e feminista, que sirva para situar na rua e no mapa político umha proposta radicalmente enfrentada a Espanha, ao capital e ao patriarcado.

Com NÓS-UP nom haverá surpresas nem manobras de curto alcance. Essa será a nossa aposta neste Dia da Pátria, um 25 de Julho para enfrentar a crise e o capitalismo espanhol, para afirmar que Galiza nom é Espanha e continuar a luita até a vitória.

Nas próximas semanas, representantes da nossa Direçom Nacional apresentarám a campanha de NÓS-UP para o Dia da Pátria deste ano, umha campanha aberta à Galiza luitadora, que nom se resigna e avança a partir das mais profundas convicçons revolucionárias e anelos de liberdade nacional, social e de género.

Direçom Nacional de NÓS-Unidade Popular

Galiza, 11 de junho de 2012