As campanhas eleitorais costumam ser fertis no que se refire a imagens e declaraçons peculiares, desta vez com o BNG e CCOO de protagonistas. E é que o secretário general de CCOO, Fernández Toxo, visitou a passada sexta-feira a sede do BNG onde mantivo umha reuniom com a sua direçom e participou em umha rolda de imprensa com Guilherme Vasques, na que tracejarom medidas para “sair da crise”.

A desesperaçom de um BNG em estado de alarma ante a possível perda de um dos dos seus deputados em Madrid, e com el de umha boa parte do orçamento que maneja, motivou um giro à esquerda com o objectivo de ficar com parte do eleitorado descontendo do PSOE e, à vez, evitar o perigoso ascenso eleitoral de Izquierda Unida na Galiza. Como parte deste show, tam comum em época eleitoral, assistimos a inédita visita do secretário general de CCOO, as mesmas que assinarom com governo e patronal a reforma das pensons, à sede do BNG para consensuar medidas para enfrentar o mais que seguro próximo governo do Partido Popular.

A inesperada visita do líder de CCOO emarca-se na rolda de contactos que Toxo iniciou com todas as forças com representaçom no Parlamento espanhol para alcançar um grande pacto polo emprego que alívie a situaçom económica que atravessa o Estado, em palavras de ambos protagonistas de tam insólita imagem. E nom só. CCOO aproveita-se da necessidades apremiantes do BNG para rachar, ainda que só seja de maneira simbólica, a indiscutida referencialidade da CIG no chamado Movimento Nacionalista Galego.