Os trabalhadoras e trabalhadores de Tecnymo protagonizam desde a semana passada um novo conflito laboral na comarca de Trasancos, que desta vez persegue denunciar o abuso que a direçom desta empresa do metal realiza da contrataçom temporária e, em simultáneo, conseguir umha maior estabilidade convertendo fixos @s obreir@s que tenhem umha antigüidade de dous anos. O calendário de mobilizaçons acordado polo pessoal que desenvolve a sua atividade nas instalaçons de Navantia em Ferrol arrancou na semana passada com paralisaçons de duas horas dos turnos de manhá e tarde e concentraçons às portas do estaleiro e completa-se com o fechamento das vias de colaboraçom com a empresa.

Segundo informa a CIG, que tem a presidência do Comité de Empresa, dos cerca de 150 trabalhadoras e trabalhadores que desenvolvem a sua atividade nas instalaçons de Navantia, só um terço tem contrato indefinido, mantendo o resto de obreir@s ligad@s laboralmente com contratos de fim de ano, apesar de alcançar antigüidades de até doze anos na empresa, incumprindo a legislaçom sobre esta modalidade de contrataçom e vulnerando o estabelecido no convénio provincial sobre os quadros de pessoal fixo.

Os operários e operárias de Tecnymo já protagonizaram outro conflito similar, precisamente quando a central nacionalista atingiu a maioria no Comité de Empresa. Daquela o conflito encerrou-se com um resultado satisfatório e com a consolidaçom de perto de 30% do quadro de pessoal.