Enquanto os distintos governos estám a aplicar um duro programa de reformas e ajustes ditado polo grande Capital, os EUA e os Estados clientes europeus e árabes iniciam umha operaçom militar contra a Líbia que vai ter um custo multimilionário.

Só durante o primeiro dia da intervençom, os 112 mísseis Tomahawk lançados polo exército dos EUA tivérom um custo que superou os 150 milhons de dólares e, segundo o National Journal, a operaçom “Odyssey Dawn” poderá superar os mil milhons de dólares, só para os fundos públicos norte-americanos.

O governo espanhol tampouco duvidou em somar-se à agressom imperialista que tem no seu alvo a rapina dos recursos naturais líbios. Apesar da catastrófica situaçom da economia espanhola, o PSOE, com o apoio explícito do PP, nom duvidou em embarcar-se numha operaçom que, ainda que menor, vai ter um elevado custo. Enquanto cortam direitos e programas sociais em nome do que dim é umha necessária disciplina orçamentária, o Estado espanhol disponibilizou para a operaçom avions, barcos e bases e, segundo evoluírem os acontecimentos, mesmo poderá participar com tropas terrestres no próprio território líbio.

Só no caso dos caças que intervenhem na operaçom, vários caça-bombardeiros F-18, o custo aproximado é de uns 7000 € por hora de voo. Só as duas operaçons de supervissom do espaço aéreo de exclusom que tenhem realizado nos últimos dias, o gasto ascende a quase 200.000 €. A esta desorbitada e desnecessária despesa, que unicamente redundará nas grandes empresas energéticas, há que somar o custo dos combustíveis e a manutençom do resto de aeronaves, barcos e pessoal despregado na zona.

Pouco parece importar tal contradiçom à casta política que o mesmo que aprova a reforma laboral, impulsiona a reforma do sistema da Segurança Social, congela pensons ou corta gasto social, hoje mesmo apoiará a Zapatero nesta nova aventura imperialista.