Autor/a: José Fernandes “Comandante Soutomaior”

Compostela 2010

ISBN: 978-84-936844-4-0

240 páginas

15€

Às portas do cinqüenta aniversário do espectacular assalto e seqüestro do Santa Maria polo DRIL a Abrente Editora publica no nosso idioma “A captura do Santa Maria. 24 homens e mais nada”, um livro inédito da autoria do galego José Fernandes Vasques, comandante Soutomaior.

Meio século depois de um dos episódios menos conhecidos da resistência galega ao fascismo resgatamos umha das iniciativas de maior projecçom internacional realizadas na longa noite de pedra: o primeiro seqüestro a nível mundial de um navio por motivos políticos.

O seu valor reside na determinaçom de combater com as armas os regimes ditatoriais ibéricos seguindo o fio condutor da insurgência guerrilheira que durante anos fijo frente ao fascismo nas montanhas e cidades galegas na década de quarenta. O DRIL foi umha tentativa de promover a luita frontal, de carácter insurrecional, contra Franco e Salazar perante a passividade da direcçom do PCE que após liquidar a guerrilha em 1948 posteriormente nom duvida em aplicar em 1956 a pactista doutrina soviética da reconciliaçom nacional.

Mas também por estar conformada por um comando basicamente galego-português, no que sem lugar a dúvidas é a primeira colaboraçom galego-portuguesa num operativo militar revolucionário. É o antecedente do que posteriormente foi o apoio que tivo entre sectores da esquerda lusa a Frente armada da UPG a meados dos setenta e o EGPGC entre a década de oitenta e noventa.

Este livro está escrito como umha crónica dos acontecimentos desenvolvidos em Caracas nos meses prévios a Janeiro de 1961 que possibilitárom a Operaçom Dulcineia que culminou com o assalto do paquebote português. Mas também como um diário dos treze dias no que o DRIL converteu o Santa Maria no Santa Liberdade, e finalmente umha explicaçom e valorizaçom dos acordos atingidos com o governo brasileiro para a entrega voluntária do barco e a liberdade dos vinte e quatro combatentes.

Autor/a: Maurício Castro

Compostela, 2009

134 páginas

ISBN 978-84-936844-3-3

10€

Os 28 textos que integram este volume, agora publicados dentro da colecçom ‘Construirmos Galiza’, fôrom anteriormente publicados em diferentes jornais,  revistas e outros meios impressos e digitais, ao longo da última década. Todos eles se caracterizam pola brevidade e polo teor divulgativo, o que facilita a sua leitura fragmentária por qualquer pessoa interessada pola sorte do galego, tendo como tema comum o conflito lingüístico existente na Galiza.

Os meios em que aparecêrom escritos os artigos seleccionados som: A Nosa Terra, Vieiros, Novas da Galiza, Abrente, Gznacion, Agália e o Portal Galego da Língua. Neles, som abordados, quase sempre a partir de episódios de actualidade relacionados com o idioma, aspectos da política lingüística galega, postos em comparaçom com outros contextos internacionais e analisados com umha perspectiva normalizadora.

Esta compilaçom, que conta com um prólogo escrito polo catedrático de Língua e Literatura Galego-Portuguesa na USC José Luís Rodrigues, forma um volume de 134 páginas que se vende a um preço de 10 euros.

A unidade da língua, a padronizaçom, o estatuto legal, o bilingüismo, os preconceitos, o sexismo na linguagem e outros ingredientes do cocktail social existente na Galiza fruto da imposiçom histórica e actual do espanhol estám presentes nestas páginas, cuja tese fundamental é sintetizada já logo no título: Galiza vencerá!

Autor/a: VVAA

Compostela, 2009

42 páginas

ISBN 978-84-936844-2-6

5€

O tema comum dos textos é a queda do socialismo soviético e, sobretodo, as perspectivas da luita capitalista 20 anos depois daquele acontecimento, posto em relaçom com a situaçom actual de crise sistémica global.

Assim, Valério Arcary trata no seu texto sobre ‘Três hipóteses sobre a situaçom aberta pola recessom em 2007/2008′; Iñaki Gil de Sanvicente escreve sobre a ‘Vigência do socialismo 20 anos depois da queda do muro’; Ana Barradas apresenta um texto intitulado ‘A crise que a paguem eles’; Domingos Antom Garcia Fernandes reflecte sobre as ‘Perspectivas revolucionárias perante a crise do sistema capitalista’; e Carlos Morais sobre a ‘Vigência da revoluçom socialista’.

Autor: Carlos Marighella

Compostela, 2009

37 páginas

ISBN: 84-933664-0-4

5€

O Manual do Guerrilheiro Urbano, publicado pola vez primeira na Galiza, apresenta umha análise completa e detalhada da actividade de umha organizaçom guerrilheira na cidade, prestando atençom a diversos aspectos fundamentais para o sucesso das suas acçons. 

A sua reflexom sobre a “violência” e o “terrorismo” é de plena actualidade, tendo em conta a actividade da resistência patriótica e antiimperialista no Iraque, mas aplicável a outras muitas latitudes: “Hoje, ser “violento” ou um “terrorista” é umha qualidade que enobrece qualquer pessoa honrada, porque é um acto digno de um revolucionário engajado na luita armada contra a vergonhosa ditadura militar e suas atrocidades”.

–

Autor: Víctor Serge

Compostela, 2009

45 páginas

ISBN: 84-930204-7-8

4€

O presente trabalho é a síntese do escrito por Vítor Serge, quem após a Revoluçom de Outubro entra nos arquivos da Okhrana, a polícia política czarista. Eram os bons tempos da III Internacional, anteriores à sua burocratizaçom.

Longe de ser um documento histórico, das conclusons de Serge tiram-se nom poucas liçons para o presente. Em primeiro lugar, desmitifica o poder dos serviços de inteligência e polícias políticas. A Okhrana foi modelo de polícia de Estado para a sua época. Por exemplo, exportou as suas técnicas a nom poucos países. No entanto, na hora de confrontar-se com um movimento insurreccional deixou a nu a sua total impotência.

Em segundo lugar, muitas vezes teme-se o que nom se conhece; conhecer os fundamentos de toda a acçom repressiva sistemática e a sua metodologia permite conhecer de quê é que devemos acautelar-nos, mas também conhecer as impossibilidades das forças reaccionárias. Um outro acerto importante de Serge é pôr o acento na sistematicidade da repressom e em explicar a sua lógica interna. Isto permite advertir aos recém iniciados sobre as atitudes conspirativas que em nada ajudam. Finalmente, fornece singelas advertências que na sua essência continuam a ser válidas para os militantes: os conselhos a respeito dos correios bem podem ser aplicados hoje nos seus fundamentos em relaçom com os correios electrónicos, bem como com todos os mais.

Autor/a: Francisco Martins Rodrigues

Lisboa, 2009

136 páginas

ISBN 978-972-8165-52-9

14€

Francisco Martins Rodrigues (1927-2008) nunca tivo tempo para umha autobiografia. Assim, compugemos umha história da sua vida a partir das entrevistas que deu ao longo dos últimos dez anos. Som transcriçons fiéis e literais do que ele dixo, relatos na primeira pessoa acompanhados de comentários e reflexons pessoais sobre os temas políticos que lhe preocuparom.

Autor/a: VVAA

Compostela, 2008

59 páginas

ISBN 978-84-936844-0-2

5€

O novo título da editora ligada ao nosso partido inclui a transcriçom das intervençons de Elena Martínez Canals (Cuba), Narciso Isa Conde (República Dominicana), Iñaki Gil de San Vicente (Euskal Herria) e Néstor Kohan (Argentina), sobre aspectos diferentes de um mesmo tema: O Socialismo do século XXI.

Em concreto, Elena Martínez Canals escreve sobre a prática transformadora e o desenvolvimento humano: vigência de um legado marxista. Narciso Isa Conde trata a actualidade do socialismo científico na luita polo novo socialismo, em funçom das mudanças no capitalismo e no imperialismo, e do novo nas alternativas revolucionárias. A intervençom de Iñaki Gil de San Vicente leva por título Comunismo ou caos e a do argentino Néstor Kohan A concepçom da revoluçom no Che Guevara e no guevarismo. Aproximaçom ao debate sobre o futuro da América Latina e o socialismo do século XXI desde o marxismo.

Autor/a: Francisco Martins Rodrigues

Lisboa, 2008 (Data da 1ª Ediçom: Março de 1985)

325 páginas

ISBN 978-972-8165-51-2

20€

Com participaçom da chancela ligada ao nosso partido, Abrente Editora, e por iniciativa dos e das camaradas portuguesas das Edições Dinossauro, acabou de ser publicada a segunda ediçom da considerada mais importante obra teórica do marxista português Francisco Martins Rodrigues: Anti-Dimitrov. 1935-1985 – meio século de derrotas da revolução. O novo volume, além de reproduzir o texto original publicado em 1985, acrescenta as ‘Notas sobre Staline’, que reflectem a evoluçom do autor posteriormente a esse ano, umha vez que o próprio Anti-Dimitrov foi concebido como um ponto de partida para a regeneraçom do comunismo.

A obra, reconhecida como umha das mais importante teorizaçons sobre a história do marxismo ao longo do século XX, parte da análise do que implicou, no quadro do VII Congresso da Internacional Comunista, a proposta do dirigente búlgaro Georgi Dimitrov, secretário-geral do referido organismo internacional entre 1934 e 1943, para a unidade de interesses de todo o povo na luita contra o imperialismo, o fascismo e a guerra.

O abandono de um caminho próprio e independente por parte do proletariado, encetado nesse momento, marcará a evoluçom dos partidos comunistas e dos movimentos revolucionários, rompendo com os princípios marxistas e leninistas relativos à independência de classe, o que para Francisco Martins determinou a degeneraçom do movimento comunista até o enfraquecimento actual. A conclusom da obra do camarada Francisco Martins é clara: se a classe operária nom puder contar consigo própria, nom poderá contar com mais ninguém.

Autor/a: Francisco Martins Rodrigues

Lisboa, 2008

103 páginas

ISBN 978-972-8165-50-5

11€

 Os textos inéditos de Francisco Martins Rodrigues (1927-2008) que aquí se publicam, começou-nos ele a escrever em 2006 e versam sobre os seus primeiros tempos de clandestinidade e prisom.
Sempre se manifestara contrário a essa ideia do velho militante que, no fim da vida, publica as suas memórias; aquelas que conhecia surgiam quase sempre embelezadas com fantasias moralizadoras. Mas foi sensível à noçom de que seria importante as geraçons que nom conhecêrom a terrível época da repressom salazarista terem à disposiçom depoimentos na primeira pessoa de protagonistas desses distantes anos do silêncio –como lhes chamou– que forçárom os “funcionários” comunistas a longos períodos de confronto com a repressom. Por isso se pujo a alinhavar estas recordaçons que, redigidas num registo pessoal e emotivo, transmitem, com toda a verdade e singeleza, várias das suas experiências de revolucionário profissional na regiom de Lisboa.
No meio de mil e um afazeres que constantemente o solicitavam, o trabalho estava incompleto quando a doença fatal o surpreendeu. No último mês de vida, ainda acrescentou alguns apontamentos, que incluímos no texto em itálico.
Na segunda parte deste livro e como complemento às narrativas redigidas em 2006, republicam-se dous textos seus, nunca editados na legalidade e há muito fora de circulaçom: o relatório sobre a tortura do sono (1966) e a defesa em tribunal (1970).
A Dinossauro publica este volume em conjunto com a galega Abrente Editora, na seqüência de um protocolo de colaboraçom e amizade através do qual, em boa hora, as duas casas editoras se comprometem a divulgar a obra de Chico Martins, a cuja acçom política tanto devem.

Autor/a: VVAA

Compostela, 2008

49 páginas

7€

Coincidindo com o 40 aniversário do seu assassinato na Bolívia as XI Jornadas Independentistas Galegas realizadas em Junho de 2007 fôrom dedicadas a analisar e reflectir sobre o pensamento e o legado do Che Guevara.

Frente aos habituais tópicos e às imagens estereotipadas da sua figura, tentou-se resgatar o Che dessa vulgarizaçom e caricaturizaçom a que foi submetido polo imperialismo desde que o converteu num souvenir, num inofensivo ícone mercantil de simples consumo, despojado do seu conteúdo subversivo e anticapitalista.

Recuperar os seus importantes contributos teórico-práticos, os princípios e valores, o coerente compromisso de revolucionário comunista tam incómodo e indigerível para as diversas variantes do reformismo social-democrata ou estalinista, e obviamente o seu exemplo foi o objectivo das XI Jornadas Independentistas Galegas.

O Che foi um combatente revolucionário que morreu de armas na mao, a combater o imperialismo, mas também foi um pensador criativo com umha vasta obra, cheia de importantes contributos para os debates mais candentes que o marxismo revolucionário livrava com o dogmatismo soviético e o fracassado modelo burocrático do socialismo realmente inexistente.

Este caderno recolhe a maioria dos relatórios apresentados nas Jornadas “Che Guevara, presente ou passado?” dando cabimento a diversas vozes e referentes da esquerda existente no País, mas também de militantes e teóricos marxistas de Cuba, do Estado francês, Euskal Herria e Portugal.

Os oito ensaios som assinados por Maurício Castro, Moncho Fernández Leal, Lois Pérez Leira, Ana Barradas, Justo de la Cueva, Domingos Antom Garcia Fernandes, Alejandro Fuentes Hernández (cônsul de Cuba na Galiza) e Michael Löwy.

Autor: Michael Löwy

Compostela, 2007

144 páginas

12€

Che que nos apresenta o companheiro Löwy nom é essa imagem de camisola adolescente, nem o idealista romántico, nem sequer só o guerrilheiro heróico, mas um dirigente comunista de primeiro nível.

Reivindicamos esse Guevara que já na década de 60 advertiu os perigos da degeneraçom burocrática do modelo soviético e nom renunciou em momento nengum ao objectivo da superaçom do capitalismo.

Hoje, quando o movimento revolucionário parece começar a se levantar dentre o entulho do muro de Berlim, é tempo de reflectir criticamente sobre os erros e acertos das etapas passadas. O cainismo e o sectarismo fôrom um mal que minou a efectividade das revolucionárias e os revolucionários em todo o mundo, e nom sobeja umha autocrítica em que se reconheça que, em multitude de ocasions, o nom entendimento entre as diferentes correntes, partidos e fracçons que hasteárom a bandeira da fouce e o martelo deveu-se mais a um simples ódio de seita do que a um confronto real entre tendências divergentes de entender e praticar a acçom política.

A Abrente Editora publica agora esta obra de Michael Löwy, reconhecido investigador marxista. Um livro que foi escrito em 1969, após só dous anos da morte de Che, e publicado em português pola editora Bertrand em meados da década de 70. No Brasil nom foi publicado até 1999 pola Editora Expressao Popular a causa da censura a que se viu submetido pola ditadura militar. Publicamos integralmente a obra originária de 1969, acompanhada polo texto “Nem decalque nem cópia: Che Guevara na procura de um novo socialismo”, difundido em Junho de 2001 na Conferência Anual da Fundaçom Che Guevara realizada em Itália.

Autor/a: VVAA

Compostela, 2007

170 páginas

12€

Esta obra recolhe nove ensaios, realizados por activistas políticos e sociais, por historiadores, de ópticas político-ideológicas diversas, tentam compreender melhor a complexidade do nosso presente e contribuir assim para o desenvolvimento e avanço da Revoluçom Galega.

A Galiza como naçom na globalizaçom neoliberal, o papel da esquerda independentista, a denúncia do nacionalismo interclassista e a reivindicaçom da classe obreira galega, a reclamaçom da memória histórica em contra da amnésia social e de leituras interesseiras do passado recente, a autodeterminaçom ou chamados em contra da predaçom do planeta, da nossa terra e da nossa língua, pois a situaçom é dramática, som alguns dos temas que aborda este volume.

Autores/a: Maurício Castro, Beatriz Peres e Eduardo Sanches Maragoto

Compostela, 2007

495 páginas

ISBN 978-84-87305-25-2

25€

Autores/as: VVAA

Compostela, 2007

134 páginas

ISBN: 84-933664-8-X

8€

Com este título, a Abrente Editora estreia a sua nova colecçom Cabeça de Égua, destinada à publicaçom de textos de criaçom literária. Coincidindo com a comemoraçom do X Aniversário da fundaçom de Primeira Linha, solicitamos a dez poetas umha colaboraçom para ser publicada sob o nome conjunto de “Dez por dez”. Eis o resultado.

A literatura galega, as escritoras e escritores galegos, tenhem umha longa tradiçom de intervençom sociopolítica e de colaboraçom com diversas entidades populares, tanto políticas como sindicais, sociais, juvenis, etc… Nessa tradiçom é que pretendemos que se insira nom só este livro, mas o conjunto da colecçom que agora começa, com estes poemas de Artur Alonso Novelhe, Suso Bahamonde, Maria Lado, Igor Lugris, Kiko Neves, Carlos Quiroga, Baldo Ramos, Concha Rousia, Séchu Sende e Ramiro Vidal.

Situada entre as comarcas da Cabreira e o Berzo, com 2.135 metros, Cabeça de Égua é o nosso particular Everest, o mais elevado cume do País, o teito da Galiza. Abrente Editora pretende dando este nome a nossa nova colecçom literária, contribuir para superar o desconhecimento que umha boa parte das galegas e galegos possuem de umha naçom negada por mais de 500 anos de assimilaçom, até o extremo de querer amputar-nos umha boa parte do território, onde a resistência popular armada à ditadura franquista escreveu algumhas das suas páginas mais brilhantes.

Autora: Noa Rios Bergantinhos

Compostela, 2002

250 páginas

ISBN: 84-930204-9-4

18€

Com este novo volume da colecçom Construirmos Galiza prosseguimos com um dos objectivos tracejados pola Abrente Editora: contribuir para a recuperaçom da história do movimento de libertaçom nacional e social de género.

Este livro analisa a esquerda independentista no último quartel do século passado, mais concretamente no período 1976-1995, em que tem lugar o desenvolvimento da primeira etapa do independentismo após a guerra civil espanhola. Estruturado em quatro capítulos, a obra realiza um rigoroso estudo da trajectória de umha etapa histórica muito próxima, convulsa, ocultada ou mitificada pola maioria d@s protagonistas, em funçom das suas particulares evoluçons políticas e pessoais.

Afastada da perseguiçom ingénua de umha virtual objectividade, a autora aprofunda e analisa com rigor e seriedade, utilizando umha profusa documentaçom -parcialmente publicada pola primeira vez no anexo documental- e variadas fontes historiográficas, a evoluçom, desenvolvimento, programas políticos, modelos e expressons organizativas, da história mais recente de um movimento que necessita conhecer, assumir e reconciliar-se com o legado do seu passado mais recente, no horizonte da superaçom e consolidaçom.

Como a maioria das obras desta chancela editorial, nom é umha obra convencional; embora a sua redacçom original parta de umha investigaçom académica, está concebida como um instrumento político que contribua para rearmar ideologicamente a esquerda independentista galega nos seus objectivos revolucionários.